Azoka Txikian garaiko produktuekin errezetak prestatuko ditu Jarri Toki jatetxeko sukaldari Gorka Urrestik

2012/07/13

Jarri Tokiko sukaldaria 11:00etatik 12:00etara egongo da Beheko plazan. Denbora tarte horretan bi errezeta prestatuko ditu, eta bertaratzen direnek prestatutakoa dastatzeko aukera edukiko dute.

Bihar, 09:00etatik eguerdiera arte, Beheko plazan, hilero bezala, Azoka Txikia egingo da.

Herritarrek eskura edukiko dute baserritarren produktuak erosteko aukera, baita Urrestik jendaurrean prestatuko dituen errezetak ikastekoa ere. "Sukaldaria azokan lanean ipinita, herritarrek garaiko produktuek ematen dituzten aukerak ikusteko balioko du; ideiak hartu eta garaiko produktu freskoekin eta kalitatezkoekin egin daitekeena praktikan jartzea da asmoa", adierazi dute Debemenetik. Modu honetan gastronomia garaiko produktuekin uztartzea lortu nahi du Debemenek, "elikaduraren garrantzia plazaratuz". "Garaiko produktuak ahora eramatean osasuna zaintzen gaudela ohartzea nahi dugu", azpimarratu dute.

Uztailean eta abuztuan Azoka Txikien maiztasuna areagotu egingo da: hileko bigarren larunbatean izateaz gain, hirugarren larunbatean ere ospatuko da. Uztailaren 21ekoa, gainera, lekuz aldatuko dute: Goiko plazan izango da. "Udan ekoizpena handitzen denez, eskaintza zabalagoa da eta erosteko aukera ere handitu nahi izan dugu".